Fréttir & tilkynningar

Hafrannsóknastofnun óskar landsmönnum öllum gleðilegs sumars!

Nýlega kom út vísindagrein sem fjallar um útbreiðslu og fæðuvistfræði 11 tegunda djúpsjávarháfa við Ísland. Rannsóknin , sem spannar nærri þrjá áratugi (1996–2023), er afar þýðingarmikil og veitir mikilvægar upplýsingar um vistfræði djúpsjávarháfa á þessu svæði.

Nýlega kom út grein um erfðafræðilega aðgreiningu stofna innfjarðar rækju (algengar á grunnslóð) og úthafs rækju (stóri kampalampi, Pandalus borealis) við norðanvert Ísland. Notast var við raðgreind skerðibútagögn úr erfðamengi rækju sem safnað var úr Arnarfirði, Skjálfanda, og alla leið út að Kolbeinsey.

Komin er út skýrsla þar sem gerð er grein fyrir framkvæmd og helstu niðurstöðum stofnmælingar botnfiska á Íslandsmiðum sem fram fór dagana 27. febrúar til 23. mars 2025.

Í morgun hófst árleg ráðstefna vinnunefndar Alþjóða hafrannsóknaráðsins (ICES) sem fjallar um notkun bergmálstækni við fisk- og sjávarrannsóknir (ICES WGFAST, Working Group on Fisheries Science and Technology, sjá vef nefndarinnar) og stendur hún til 11. apríl.

Um 80 manns tóku þátt í fyrsta fundi í ICEWATER verkefninu, sem haldinn í lok mars húsnæði Orkuveitu Reykjavíkur í Elliðaárdalnum í Reykjavík. Fundurinn markaði upphaf þessa metnaðarfulla verkefnis, sem miðar að því að flýta fyrir og bæta innleiðingu vatnaáætlunar á Íslandi.

Hafrannsóknastofnun ráðleggur að veiðar á grásleppu fiskveiðiárið 2024/2025 verði ekki meiri en 2760 tonn. Er það um 32% lækkun milli ára.

Fimmtudaginn 27. mars kl. 12.30 verður haldin málstofa á vegum Hafrannsóknastofnunar sem ber yfirheitið Loðna í eldi: vöxtur, lifun og þroski loðnu alinnar á mismunandi hitastigum. Einar Pétur Jónsson doktorsnemi á Hafrannsóknastofnun flytur erindið.

Hafrannsóknastofnun leitar eftir metnaðarfullum sumarstarfsmanni á svið Mannauðs og miðlunar.

Hafrannsóknastofnun stóð nýlega fyrir námskeiði í söfnun og greiningu á púpuhömum rykmýs, sem safnað hefur verið úr ám og vötnum víða á landinu. Fyrir rúmri viku var vitað til þess að um 90 tegundir rykmýs væru þekktar hér á landi. Í síðastliðinni viku bættust við 10 áður óþekktar tegundir.