Fréttir & tilkynningar

Utanríkisráðuneytið, Hafrannsóknastofnun og Alþjóðahaffræðinefnd UNESCO (IOC) efna til opins fundar í tilefni af útgáfu skýrslu IOC um ástand hafsins – State of the Ocean Report 2024. Fundurinn verður haldinn mánudaginn 3. júní kl. 10:00-11:15 í húsakynnum Hafrannsóknastofnunar að Fornubúðum 5 í Hafnarfirði og fer fram á ensku.

Hafrannsóknastofnun leitar að öflugum verkefnastjóra með góða þekkingu á aðferðafræðum verkefnastjórnunar. Starfið mun fela í sér að skipuleggja og leiða vinnu við stefnumótun og verkefni tengd henni. Starfið mun einnig fela í sér að byggja upp og miðla þekkingu á verkefnastjórnun innan stofnunarinnar og vinna með teymum að skipulagningu verkefna og halda utan um framgang þeirra.

Nýlega kom út ný yfirlitsgrein í “Reviews in Fishery Biology and Fisheries” sem heitir ”Yfirgefin, tínd eða brottköstuð veiðarfæri frá fiskveiðum í ferskvatni”. Eins og titilinn ber með sér þá er hér fjallað um veiðarfæri sem verða eftir í ferskvatnskerfum heimsins oftast í tengslum við atvinnuveiðar en einnig frístundaveiðar.

BioProtect er nýtt verkefni á vegum Evrópusambandsins og hefur formlega verið hleypt af stokkunum. Verkefnið kemur til móts við þær brýnu áskoranir sem mannlegar athafnir ásamt loftslagsbreytingum hafa haft á sjávarvistkerfin okkar.

Þann 17. maí heldur Selasetur Íslands sitt þriðja málþing í húsnæði sínu að Strandgötu 1, Hvamstanga í samstarfi við Hafrannsóknastofnun. Margir áhugaverðir fyrirlestrar tengdum selum og lífríki þeirra verða í boði. Sumir fyrirlestrana eru um verkefni sem Selasetrið hefur unnið í samstarfi við Hafrannsóknastofnun ásamt kynningu á nemendaverkefnum sem Sandra Granquist, dýraatferlis- og vistfræðingur hjá Hafrannsóknastofnun hefur haft umsjón með.

Útskrift 25. árgangs nemenda Sjávarútvegsskóla GRÓ fer fram miðvikudaginn 15. maí. Athöfnin fer fram í hátíðarsal Hafrannsóknastofnunar, Fornubúðum 5 Hafnarfirði og hefst kl. 15:10. Að athöfninni lokinni munu útskriftarnemendur kynna verkefni sín á sérstakri veggspjaldasýningu.

Það var kampakátur hópur rannsóknafólks og áhafnameðlima sem brosti framan í myndavélina áður en rannsóknaskipið Bjarni Sæmundsson lagði af stað í árlegan vorleiðangur Hafrannsóknastofnunar þann 13. maí. Leiðangurinn er liður í langtímavöktun hafs en vistkerfisrannsóknir eru framkvæmdar á dýrasvifi (átu), plöntusvifi (gróðri), næringarefnum, hita og seltu (ástand sjávar) á hafsvæðinu við Ísland.

Nýlega var birt greinin Langtímaleitni og bjögun í tengslum við rannsóknir á vernd líffræðilegrar fjölbreytni í vísindaritinu Cell Reports Sustainability. Í greininni birtist tölfræðileg samantekt greina um verndarlíffræði, sem gefnar hafa verið út í fjórum alþjóðlegum verndarlíffræðiritum á tímabilinu 1968 til 2020. Í greininni er sýnt fram mikla og langvarandi bjögun rannsókna á tegundum og vistkerfum þegar sjónum er beint að - athygli rannsóknarsamfélagsinns í samanburði við tegundir og heimkynni þeirra sem eru skráðar í hættu á rauðum lista Alþjóðlegu náttúruverndarsamtakanna yfir tegundir í útrýmingarhættu.

Hafrannsóknastofnun boðar til fundar um málefni ferskvatnsfiska fimmtudaginn 16. maí 2024 kl. 8.30, í aðdraganda komandi veiðisumars. Fundurinn verður haldinn í húsakynnum Hafrannsóknastofnunar að Fornubúðum 5 í Hafnarfirði. Gestum verður boðið að þiggja morgunverð fyrir fundinn.

Vatnsþurrð er nú í Grenlæk í Landbroti, einni af mestu sjóbirtingveiðiám landsins. Við vettvangsskoðun 2. maí sást að efstu 11 km Grenlækjar á svæðinu ofan við Stórafoss eru þurrir, en þar eru mikilvægar hrygningar- og uppeldisstöðvar fyrir sjóbirting. Mikið sást af dauðum sjóbirtingum, flestir voru þeir yfir 50 cm langir og að líkindum fiskar sem hrygndu á sl. hausti.