Fréttir & tilkynningar

Út er komin skýrsla Hafrannsóknastofnunar um meðafla fugla og sjávarspendýra í grásleppuveiðum árin 2020-2023. Helstu niðurstöður voru þær að meðafli sjávarspendýrategunda, sérstaklega útsels, var metinn töluvert lægri en á árunum þar á undan.

Hnúfubakar í Hafnarfjarðarhöfn hafa kætt bæði starfsfólk Hafrannsóknastofnunar og vegfarendur við höfnina enda hefur útsýnið oft verið á pari við bestu hvalaskoðun. En svaml hnúfubaksins hefur ekki dugað vísindafólki stofnunarinnar sem hefur velt fyrir sér af hverju hvalurinn heldur sig á þessum slóðum. Og nú liggur svarið fyrir; mælt með aðferðum hafrannsókna, bergmálsmælingum og -skráningum og sýnatöku. Svarið í stuttu máli er að hnúfubakar hafa verið að eltast við töluvert magn af smásíld og brislingi en einnig ufsa.

Haldið verður aftur af stað til loðnumælinga nk. mánudag 5. febrúar en síðustu loðnumælingaleit lauk þann 23. janúar sl. Fyrirhugað var að rannsóknarskipið Árni Friðriksson RE 200 færi til mælinga ásamt veiðiskipunum Ásgrími Halldórsyni og Polar Ammassak. Við botnskoðun á Árna í slipp í Hafnarfirði nú í vikunni kom hins vegar fram olíuleki með driföxli sem gera þarf við, m.a. til að koma í veg fyrir mengun, og getur hann því ekki tekið þátt í verkefninu.

Nýlega var komið fót alþjóðlegu samvinnuverkefni til að styrkja samvinnu í örplastsrannsóknum. Markmið verkefnisins er að bæta rannsóknarinnviði og styrkja samvinnu milli vísindamanna í Eistlandi, Finnlandi, Íslandi og Lettlandi á sviði rannsókna á örplasti í umhverfinu.

Ný rannsókn sýnir fram á að hægt er að nota geislakolefni frá kjarnorkusprengjum til að staðfesta aldur langreyða. Ekki nóg með að það sé óvenjulegt að nýta kjarnorkusprengjur í þessum tilgangi, þá er það einnig óhefðbundið að eyrnamergur (e. ear plug) hvalanna er mældur en það er hann sem staðfestir aldur hvalanna.

Málstofan fjallar um víðtækar og hnattrænar afleiðingar plastmengunar á dýralíf sjávar, með áherslu á tíðni og umfang plastmengunar í vistkerfum sunnan við norðurheimskautsbaug. Athugun þessi beinist að lífveru sem hefur tekið að sér hlutverk varðliða plastmengunar; nefnilega langreyðar (Balaenoptera physalus), að sumri á hafsvæðinu við Vesturland.

Ný rannsóknaraðferð nýtir fornt erfðaefni sem geymst hefur í sjávar setlögum og gefur áreiðanlegar vísbendingar um útbreiðslu hafíss á norðurslóðum.

Hafrannsóknastofnun mun ekki breyta fyrri ráðgjöf um engar loðnuveiðar á þessari vertíð eftir mælingar síðustu vikuna. Ástæða þess er að lítið mældist og sterkar líkur á því að loðna sé enn undir hafísnum norðvestur af Íslandi.

Í dag, mánudaginn 22. janúar kl. 16:30 verður Filipa Samarra með fyrirlestur í opnu streymi. Titill fyrirlestursins er The Vestmannaeyjar Research Centre: research on killer whales and other cetaceans.

Warsha Singh, vistfræðingur á uppsjávarsviði Hafrannsóknastofnunar, hefur verið valin til að taka þátt í Alþjóðlegum degi kvenna í marghliða samvinnu 2024. Viðburðurinn er á vegum menningar- og menntamálastofnunar Sameinuðu þjóðanna (UNESCO) og verður haldinn 25. janúar nk. í höfuðstöðvum þeirra í París.