Rekdufl við yfirborð sjávar

Magnús Danielsen og Jacek Sliwinski, sérfræðingar Hafrannsóknastofnunar. Ljósm. Hafrannsóknastofnun

Hafrannsóknastofnun ásamt Veðurstofunni, Háskóla Íslands og Landhelgisgæslunni taka þátt í samstarfsverkefni með bandarískum vísindamönnum m.a. við Scripps hafrannsóknastofnunina við háskólann í San Diego, en þau leiða vísindahluta verkefnisins. Rekdufl sem eru sjósett í leiðöngrum stofnunarinnar safna gögnum við yfirborð hafsins en þau eru hluti af stórum flota af rekduflum. Í leiðangri í febrúar var farið langt suður af landinu til að sjósetja þar 23 dufl auk 14 annarra sem sett voru út á mælistöðvum Hafrannsóknastofnunar (mynd 1) en árið á undan voru 21 dufl sjósett í nokkrum leiðöngrum. Rekduflin eru mismunandi gerðar og mæla ekki öll það sama, meðal mælistærða eru loftþrýstingur, yfirborðshiti sjávar, ölduhæð og tíðni öldu. Rekduflin senda gögn í rauntíma og er hægt að skoða staðsetningu þeirra, farleið og gögnin sem þau senda á vefsíðunni: https://gdp.ucsd.edu/apps/projects/noaa/global-drifter-program.html

Dæmi um farleiðir þriggja rekdufla frá sjósetningu þeirra í febrúar er á mynd 2.

Mynd 1. Staðsetningar virkra yfirborðsrekdufla umhverfis Ísland í apríl 2021. Flest voru sjósett djúpt suður af landinu á þessu ári. Mismunandi litir á táknum gefa til kynna þá mælinema sem rekduflin hafa.

Mynd 2. Farleiðir þriggja rekdufla frá því að þau voru sjósett austan og vestan landsins í febrúar 2021.