Vorrannsóknir á sjó og svifi

Ljósm. Svanhildur Egilsdóttir

Rannsóknaskipið Bjarni Sæmundsson lagði af stað í árlegan vorleiðangur Hafrannsóknastofnunar þann 16. maí. Leiðangurinn er liður í langtímavöktun á ástandi sjávar, næringarefnum, gróðri og átu á hafsvæðinu við Ísland.

Ársferðisrannsóknir á þessu sviði hafa farið fram í maí/júní í um 60 ár. Ásamt því að kanna ástandið á föstum sniðum út frá landinu eru gerðar mælingar með síritandi mælitækjum á siglingaleið skipsins. Magn og útbreiðsla ljósátu er mæld með bergmálstækni og samliða því eru ljósátusýni skoðuð.

Auk framangreindra og hefðbundinna rannsókna eru tekin sýni á völdum stöðum til greininga á erfðarefni svifþörunga í vatnsbolnum og setkjarnar sóttir frá botninum. Verkefnið er hluti rannsóknasamstarfs Kaupmannahafnarháskóla og íslenska ríkisins sem efnt var til, til heiðurs Margréti Þórhildi drottningu Dana og Vigísi Finnbogadóttur forseta. Einnig verður safnað sýnum fyrir Geislavarnir ríkisins vegna vöktunar á magni geislavirkra efna í sjó og tekin verða upp hlustunardufl djúpt út af Langanesi og Krossanesi vegna rannsóknar á atferli andanefja og annarra hvala en það verkefni er á vegum vísindamanna við Háskóla Íslands.

Áætlað er að leiðangurinn vari í 15 daga og fylgjast má með gangi hans á skip.hafro.is.