Smá- og víðsjár endurnýjaðar á Hafrannsóknastofnun

10. desember 2024

Laure de Montety sjávarlíffræðingur við splunkunýja Olympus SZX16 víðsjá. Laure de Montety sjávarlíffræðingur við splunkunýja Olympus SZX16 víðsjá.

Hafrannsóknastofnun endurnýjaði á dögunum tækjakost sinn vegna smá- og víðsjáa. Eftir útboð á Evrópska efnahagssvæðinu var tilboð frá Medor samþykkt fyrir tvær smásjár og fjórar víðsjár frá Olympus. Eldri tæki voru komin verulega til ára sinna og hættar að standast kröfur nútímans.

 

Olympus IX73 viðsnúin smásjá. 

Uppsetning á tækjum: Baldur Ingólfsson (t.v.) og Sigurður Jens Sæmundsson (t.h.), báðir frá Medor. Eftir að myndin var tekin tók við mikið púsluspil að setja græjurnar saman, jafnvel svo að öll samsetning vara frá IKEA bliknaði.

Dæmi um mismunandi ljósstýringu og ljóssíun. a) hefðbundin lýsing, ”bright-field”, b) svartur bakgrunnur, ”dark-field”, c) fasakontrast (Phase Contrast), d) DIC (Differential Interference Contrast, e) Rheinberg lýsing og f) flúrljómun.

 

Marfló af tegundinni pontoporeia-femorata, mynd sem var tekin í einni af nýju smásjánni. 

Smásjárnar eru tvennskonar, þ.e. hefðbundin smásjá og viðsnúin smásjá eða það sem kallað er Inverted Microscope á ensku. Víðsjárnar eru allar af svipaðri gerð. Tvær víðsjár verða í rannsóknastofu Hafrannsóknastofnunar á Ísafirði, en hin tækin verða í i höfuðstöðvum stofnunarinnar að Fornubúðum í Hafnarfirði.

Með hverri smásjá og víðsjá fylgir myndavél sem er nýlunda sem styrkir mjög vísindastarfið. Báðar smásjárnar gefa möguleika á að skoða sýni með svonefndu Diffrential Interference Contrast (DIC) sem einnig er nýlunda við greiningar sýna hjá Hafrannsóknastofnun og ljóst að tækin eiga eftir að nýtast við rannsóknir á öllum fagsviðum og efla rannsóknir Hafrannsóknastofnunar.
Til baka

Fannst þér efnið á síðunni hjálplegt?