GRÓ-FTP

UNESCO GRÓ Sjávarútvegsskóli á Íslandi tók til starfa 1. janúar 2020.

Hann er byggður á grunni Sjávarútvegsskóla Háskóla Sameinuðu þjóðanna sem var stofnaður árið 1998 með þríhliða samkomulagi milli Háskóla Sameinuðu þjóðanna, utanríkisráðuneytisins og Hafrannsóknastofnunar.

Þróunarsamvinnumiðstöðin, sem skólinn er nú hluti af, heitir fullu nafni GRÓ - Þekkingarmiðstöð þróunarsamvinnu og er sjálfstæð miðstöð um uppbyggingu færni og þekk­ingar í þróunarlöndum.

Hún er mynduð af þeim fjórum skólum á Íslandi sem áður voru hluti af Háskóla Sameinuðu þjóðanna – en auk Sjávarútvegsskólans voru það Jarðhitaskólinn, Landgræðsluskólinn og Jafnréttisskólinn.

Þróunarsamvinnumiðstöðin starfar undir merkjum Mennta-, vísinda- og menningarmálastofnunar Sameinuðu þjóðanna, UNESCO, og er fyrsta þverfaglega miðstöðin sem það gerir.

Eftir sem áður verður Sjávarútvegsskólinn áfram hýstur af Hafrannsóknastofnun.

• Sjá nánar um GRÓ - Þekkingarmiðstöð þróunarsamvinnu

Starfsemin

Sjávarútvegsskólinn er rekinn í nánu samstarfi fræða- og menntasamfélagsins, stjórnvalda og atvinnulífs. Meðal samstarfsaðila á Íslandi má nefna Matís, Háskóla Íslands, Háskólann á Akureyri og Háskólann á Hólum. Daglegur rekstur er í höndum sex starfsmanna.

Meginviðfangsefni skólans er að byggja upp færni og þekkingu meðal sérfræðinga á sviði sjávarútvegs og fiskeldis í þróunarlöndum og innan þeirra stofnana og samtaka er þeir vinna í.

Sex mánaða nám á Íslandi

Umfangsmesti þátturinn í starfsemi Sjávarútvegsskólans er sex mánaða námið, en það er haldið á hverjum vetri fyrir sérfræðinga á sviði sjávarútvegs og fiskeldis í þróunarlöndum. Í náminu eru sérfræðingarnir efldir faglega og búnir undir að hafa áhrif í því starfsumhverfi er þeir koma frá.

• Sjá nánar um sex mánaða námið

Verkefni í samstarfslöndum

Sjávarútvegsskólinn veitir stofnunum og samtökum á sviði sjávarútvegs og fiskeldis í þróunarlöndum margvíslega aðstoð og þjónustu. Um getur verið að ræða tæknilega ráðgjöf, hönnun námskeiða, þátttöku í rannsóknaverkefnum o.s.frv.   

• Sjá nánar um verkefni í samstarfslöndum

Stutt við fyrrum nemendur

Sjávarútvegsskólinn hefur til nokkurra ára styrkt fyrrum nemendur í sexmánaðanáminu til þátttöku í alþjóðlegum ráðstefnum. Ber þar hæst samstarf við International Institute for Fisheries Economics and Trade (IIFET) og World Seafood Congress (WSC) sem halda ráðstefnur annað hvort ár.

Þá býður skólinn þeim sem lokið hafa sex mánaða náminu að sækja um styrk til meistara- eða doktorsnáms við íslenska háskóla, en með því skilyrði að hluti rannsóknavinnu vegna lokaverkefna fari fram í heimalöndum.

Uppfært 1. desember 2021.

• Sjá nánar um fyrrum nemendur