Rannsóknir á fiskistofnum Hlíðarvatns í Selvogi 2012

Hlíðarvatn í Selvogi er frjósamt vatn þar sem staðbundin bleikja er ríkjandi tegund. Aðrir laxfiskar finnast þar aðeins sem flækingar. Rannsóknir á fiskstofnum Hlíðarvatns voru gerðar árin 2008 og 2012. Bleikjuafli á sóknareiningu (CPUE) í staðlaða netaseríu minnkaði úr 25,6 bleikjum árið 2008 niður í 8,5  bleikjur árið 2012. Á sama tíma fækkaði skráðri bleikju í stangveiði úr 2167 fiskum árið 2008 niður í 725 fiska árið 2012. Meðalfjöldi skráðra bleikja í stangveiði árin 1999-2012 var um 2500 bleikjur. Lengdardreifing bleikju í netaveiði var sambærileg árið 2012 og 2008. Helsta fæða bleikjunnar bæði árin voru vatnabobbar. Greining á PKD-nýrnasýkingu leiddi í ljós að 81% bleikju (n=31) á öðru ári og 50% bleikju (n=4) á þriðja ári voru smitaðir. Rannsóknir á vefjasýnum sýndu umtalsverðar skemmdir í nýrnavef sem bendir til þess að fiskarnir hafi verið í afturbata og hafi því á einhverjum tíma sumars haft PKD-nýrnasýki. Fjórar flundrur veiddust í tilraunanet 2012 en níu árið 2008.