Laxarannsóknir í Fróðá 2015

Árið 2015 veiddust 140 laxar í stangaveiði í Fróðá, en auk þess 11 bleikjur og 1 urriði. Alls veiddust 122 eins árs laxar úr sjó og 16 tveggja ára laxar. Öllum stórlöxum var sleppt og 59% smálaxa. Góð laxveiði hefur verið í Fróðá frá árinu 2007 sem tengd er stækkun framleiðslusvæða fyrir lax vegna fiskvegagerðar, auk hagstæðra umhverfisskilyrða. Mælingar á seiðaþéttleika hafa farið fram árlega frá 2008 á Fróðárdal og hefur lax náð að hrygna og klekjast þar öll árin á þessu tímabili. Nýliðun hefur þó mælst breytileg og er mikilvægt að tryggja að gönguleiðin upp á Fróðárdal sé greið til að tryggja samfellu í sjálfbærri nýtingu búsvæðanna.