Þéttleiki og stærð urriðaseiða í vatnsföllum við Hraunsfjarðarvatn og Baulárvallavatn árið 2021. HV 2022-15

Reglulegar rannsóknir hafa farið fram á urriðastofnum Hraunsfjarðarvatns og Baulárvallavatns frá því Múlavirkjun tók til starfa árið 2005. Markmið þeirra rannsókna er að meta áhrif virkjunarinnar á urriðastofna vatnanna. Í þessari skýrslu er gerð grein fyrir ástandi urriðaseiða í lækjum og ám við vötnin árið 2021. Vísitala þéttleika 0⁺ og 2⁺ urriðaseiða í vatnsföllum við Baulárvallavatn var yfir langtíma meðaltali árið 2021 en vísitala þéttleika 1⁺ urriðaseiða var rétt undir meðaltali. Þéttleiki 0⁺ urriðaseiða í Fosslæk við Hraunsfjarðarvatn var yfir meðaltali en þéttleiki 1⁺ og 2⁺ urriðaseiða var þar undir meðaltali. Vísitala þéttleika urriðaseiða hefur verið mjög breytileg eftir vatnsföllum og árum en almennt má segja að vísitalan í vatnsföllum við Baulárvallavatn hafi vaxið til ársins 2011 þegar hún náði hámarki en síðan farið lækkandi til áranna 2015, 2016 og 2017 þegar vísitala á seiðaþéttleika var mjög lág í vatnsföllum við Baulárvallavatn.