SÍLD

Almennar upplýsingar

Íslenska sumargotssíldin (Clupea harengus) er uppsjávarfiskur sem er að finna allt í kringum landið. Hún lifir á breiðu dýptarsviði frá yfirborði og niður á 400m dýpi og við hitastig frá 1-15°C (Jakobsson 2000). Aðalvetursetustöðvar hennar, svo og veiðisvæði, hafa ýmist verið grunnt eða djúpt úti af Austur- eða Vesturlandi eða grunnt út af Suðurlandi (Jakobsson 1980, Óskarsson o.fl. 2009). Síldin hrygnir í júlí, og eru hrygningarstöðvar hennar að finna meðfram suður- og suðvesturströnd Íslands (Óskarsson og Taggart 2009, Jakobsson o.fl. 1969). Eftir klak hrogna á botninum berast lirfur norður fyrir land með straumum og eru helstu uppeldisstöðvar að finna í fjörðum fyrir norðvestan og norðan land (Guðmundsdóttir o.fl. 2007).

Leiðangrar

Lýsing

Gögn sem notuð eru við stofnmat á sumargotssíld eru fengin frá árlegum bergmálsleiðöngrum sem hafa verið farnir síðan 1973 (Mynd 1). Vanalega eru þessir leiðangrar á tímabilinu október–mars. Leiðangurssvæðið er ákveðið út frá fyrirliggjandi upplýsingum um dreifingu stofnsins frá veiðum á fyrri og yfirstandandi ári. Stærð yfirferðasvæðis leiðangranna er breytilegt milli ára, en markmiðið er að ná yfir allan veiðistofninn á hverju ári. Haustleiðangurinn 2023 náði ekki að mæla þann hluta stofnsins sem hefur í auknu mæli verið fyrir austan land á haustin og er því ekki í bergmálsvísitölunni veturinn 2023/2024. Síðustu ár hefur blöndun síldarstofna (íslensk sumargotssíld og norsk-íslensk vorgotsíld) austan við land aukist sem skapar vandræði við stofnmælingar. Haustið 2023 var ákveðið að seinka haustleiðangri um nokkrar vikur, með þá von um að norska síldin yrði gengin austur frá Íslandsmiðum og íslenska síldin yrði eftir til mælinga. Í leiðangrinum fannst þó engin síld á landgrunninu og utan þess og ljóst að íslenska síldin fylgdi þeirri norsku austur á bogin, þó það sé óljóst hversu langt hún fór. Þá mældist nánast ekkert af síld suðaustan og austan við landið í leiðangrinum. Í loðnuleiðangri í febrúar 2024, fannst þó ungsíld við suðurströndina og niðurstöður þeirra mælinga eru notaðar að einhverju leiti hér. Frekari upplýsingar um leiðangra vetursins eru að finna í leiðangursskýrslum (Bjarnason, 2024).

Bergmálsvísitala fyrir veiðistofninn veturinn 2023/2024 er því fengin frá einum bergmálsleiðangri á Bjarna Sæmundssyni, sem farinn var í lok mars 2024 á aðalvetursetusvæði stofnsins vestan við landið og tveim loðnuleiðöngrum sem mældu ungsíld við suðausturströndina (AH3-2024 og AMM3-2024). Auk þess að bergmálsmæla stofninn, er markmiðið leiðangra að fá mat á hlutfalli Ichthyophonus sýkingar í stofninum. Aðferðir við að greina sýkinguna voru þær sömu og undanfarin ár (Óskarsson og Pálsson, 2018). Sýnatökur eru tíundaðar í töflu 1.

Ichthyophonus sp. sýking hefur verið viðvarandi í sumargotssíldinni síðan 2008. Dánartíðni vegna sýkingarinnar var áður áætluð með NFT-ADAPT stofnmatslíkaninu, og var það metið að 30% af smitaðri síld dræpist árlega (Óskarsson o.fl. 2018a). Sú forsenda hefur verið notuð í stofnmatinu og er sýkingardauða (M_sýkt) bætt við fastan náttúrulegan dauða (M=0.1) fyrir hvern aldurshóp hvert ár (M_aldur, ár = 0.1 + M_sýkt × 0.3).

Sem hluti af mati vinnuhópsins WKICEHER (ICES 2024), var dánartíðni vegna sýkingarinnar endurmetið með Muppet líkaninu á svipaðan hátt og Óskarson o.fl 2018a. Muppet líkanið var einnig notað áður og skilaði sömu dánartíðni og NFT-Adapt líkanið eða 0,3. Dánartíðnin var endurmetinn á grundvelli sýkingarmats eftir mismunandi aldurshópum og, ólíkt fyrra mati, var ályktað að sýkingin næði yfir allt tímabilið (2008-2022). Þetta var talið viðeigandi vegna þess að ekki hefur verið gerð ítarleg rannsókn á þróun sýkingarstiga og útbreiðslu sýkinga á undanförnum árum. Við gerð stofnmatssins var margfeldisstuðullinn endurmetinn fyrir árin 2008-2023 og var metinn 0,22. Fjöldi smitaðra af Ichthyophonus sýkingunni í stofninum árið 2023/24 var metið fyrir hvern aldurshóp á sama hátt og gert hefur verið frá upphafi smits haustið 2008 (Óskarsson og Pálsson, 2018).

Niðurstöður

Í síldarleiðöngrunum veturinn 2023/24 mældist síld vestur af landinu í lok mars 2024, og suðaustan við landið í febrúar 2024 (Mynd 2). Bergmálsvísitala samkvæmt þessum tveimur leiðöngrum nam 2,51 milljörðum í fjölda (tveggja ára og eldri) og var heildarlífmassinn metinn 432 þús. tonn (Tafla 1). Hluti veiðistofnsins (≥ 27 cm) var metinn 60% af heildarstofninum og reyndist vera 88% af lífmassanum, eða 380 þús. tonn. Magn síldar sem mældist fyrir austan land hefur verið breytilegt í gegnum tíðina en aukist síðustu ár (Mynd 1). Eins og kemur fram að ofan náðist ekki að mæla síld í haustleiðangrinum fyrir austan og sunnan land, þrátt fyrir töluverðar veiðar þar úr stofninum vikurnar á undan. Því má telja öruggt að hluti stofnsins, af óþekktri stærðargráðu, hafi ekki verið mældur og sé því ekki inn í bergmálsvísitölunni. Mat á sýkingarhlutfalli sumargotssíldar af völdum Ichthyophonus í aflasýnum vetrarins sýna að undanfarin ár hefur hlutfallið farið lækkandi. Metið sýkingarhlutfall fyrir yngri síldina (2-4 ára) var <4,1% þegar veiðisvæðin fyrir austan og vestan eru tekin saman, og fyrir 5-12 ára var hlutfallið 4-25%. Enn eru þó nýsmit að eiga sér stað eins og sést í yngri síldinni, svo að gert er ráð fyrir eins smitdauða árið 2024, líkt og undanfarin ár (Mynd 3).

Veiðar

Heildarafli á vertíðinni 2023/2024 var 94 422 tonn (Tafla 2, Mynd 4 og 5). Þetta nær einnig til meðafla síldar í veiðum á makríl og norsk-íslenskri síld í júní – nóvember 2023, þar sem sá hluti sem veiddur er í júní – ágúst tilheyrir fyrra fiskveiðiári. Ráðlagt aflamark fyrir fiskveiðiárið 2023/2024 (september – ágúst; ICES, 2022) og aflamark var 92 634 tonn (Tafla 2). Fyrir vestan veiddust 66 396 tonn, aðallega í september–desember, og 28 022 tonn austan við landið í júlí–nóvember sem meðafli í veiðum á norsk-íslenskri síld og makríl.

Allur afli ársins 2023/2024 var tekinn í flotvörpu (Mynd 4). Á vertíðunum 2007/2008 til 2012/2013 var meginhluti aflans (~90%) veiddur í nót í Breiðafirði (Mynd 5), en áður var hann aðallega veiddur út af suður-, suðaustur- og austurströndinni. Árið 2013/2014 var vísbending um breytingar á þessu mynstri, með minna hlutfalli í Breiðafirði, og síðan 2014/2015 hefur stærstur hluti veiðanna átt sér stað vestur af landinu. Til að vernda ungsíld (27 cm og minni) í veiðunum er svæðislokunum framfylgt á grundvelli reglugerðar um síldarveiðar sem settar voru af Sjávarútvegsráðuneytinu (nr. 376, 8. október 1992). Engin lokun var gerð á síldarveiðum 2023/24.

Fjöldi í afla, þyngd og kynþroski

Við mat á aldurssamsetningu í veiðunum er stuðst við sýni úr afla veiðiskipa sem safnað er á sjó af sjómönnum og upplýsingum um afla frá Fiskistofu. Í úrvinnslunni á gögnunum í ár var heildaraflanum skipt niður í þrjár sellur á grundvelli veiðisvæðis og tíma á árinu. Á sama hátt voru notuð mismunandi þyngdar-lengdarsambönd frá aflasýnum. Þar sem veiðin fór aðallega fram á tveimur svæðum (austan og vestan) voru tvö aldurs-lengdarsambönd notuð. Þróun fjölda fiska í afla eftir aldri frá árinu 1975 eru sýnd á Mynd 6. Frá árinu 2008 má sjá að stór hluti landaðs síldarafla er eldri fiskur samanborið við fyrri tímabil. Stórir árgangar frá 2017 og 2018 komu inn í aflann sem 4- og 5-ára. Í leiðangursvísitölum má sjá þessa sömu áberandi árganga á undanförnum árum, þó að 2017 árgangurinn hafi verið vanmetinn sem 5-ára í leiðöngrum. Vísitölur frá leiðangrinum sýna að 2019 árgangurinn kunni einnig að vera yfir meðalstærð (Mynd 6). Breytingar í meðalþyngd eftir aldri sem fengin er úr aflasýnum er sýnd á Mynd 7. Hlutfall kynþroska fisks eftir aldri var sett fast eins og verið hefur undanfarin ár þar sem 20% af 3 ára er kynþroska, 85% af 4ra ára og 100% af 5 ára og eldri.

Stofnmat

Greining inntaksgagna

Skoðun á aflaferlum byggt á leiðangursgögnum fyrir árganga 1989-2018 (Mynd 8) sýnir að heildardánarstuðullinn (Z) í stofninum sé um 0,4. Það er byggt á þeirri forsendu að sóknin hafi verið sú sama allan tímann. Undanfarin ár hefur veiðin breyst mikið vegna sýkingar, dreifingar stofnsins og fjöldadauða í Kolgrafarfirði 2012/2013. Aflaferlar byggðir á aflagögnum voru einnig skoðaðir fyrir hvern árgang árin 1989–2018 (Mynd 9). Dánarstuðull aflagagna sýnir svipaða niðurstöðu og fengust úr leiðangursgögnunum, sem virðist vera nálægt 0,4. Það er vísbending um að fiskurinn er að ganga inn í veiðistofninn í auknum mæli allt til 5 ára aldurs þegar hann er að öllu jöfnu að fullu genginn inn. Ekki er hægt að greina aukna dánartíðni í stofninum af völdum Ichthyophonus sýkingar af aflaferlunum. Hins vegar, miðað við að dregið hafi verið úr veiðinni í upphafi sýkingarinnar, þá þýðir svipaður dánarstuðull aukið M á því tímabili, sem er sterk vísbending um að sýkingardauði hafi átt sér stað.

Stofnmatslíkön og inntaksgögn

Stofnmatsaðferð á síld fór í ítarlegt rýni í mars 2024 (WKICEHER 2024; ICES 2024) sem varð til þess að gerðar voru breytingar á stofnmatsaðferðum, auk þess sem viðmiðunarmörk voru endurmetin. Nýtt stofnmatslíkan, SAM (Nielsen og Berg 2017), var tekið upp og á Mynd 10 má sjá skýringarmynd af metnum stikum SAM stofnmatslíkans en líkaninu er betur lýst í skýrslu ICES (ICES 2024). Í ár voru afla- og leiðangursgögn notuð frá 1987/88–2023/24. Önnur inntaksgögn samanstóðu af: (i) meðalþyngd eftir aldri (Mynd 7); (ii) fast hlutfall kynþroska eftir aldri; (iii) náttúrulegur dauði, M=0,1 fyrir alla aldurshópa öll ár, nema 2009–2023 þar sem bætt er við viðbótar dánartíðni út af Ichthyophonus sýkingunni (Mynd 11; ICES 2024, Óskarsson o.fl., 2018a); (iv) hlutfall M fyrir hrygningu var sett sem 0,5; og (v) hlutfall F fyrir hrygningu var sett sem 0.

Niðurstöður líkans

Mátgæði líkansins (e. gooness of fit) eru nálægt aldursdreifingum bæði úr afla (Mynd 12) og úr leiðangri (Mynd 13). Mat líkansins eru ekki frábrugðin mældum gildum fyrir flesta aldurshópa þó sést að yngri aldurshóparnir (<5 ára) falla ekki jafn vel að mældum gildum og þeir eldri. Einnig má sjá að mátgæði líkansins lýsir betur leiðangursgögnum í seinnihluta tímaseríunnar. Leitni var í frávikum frá niðurstöðum líkansins og gögnum um afla eða leiðöngrum (Mynd 14) sem undirstrikar ónákvæmni í leiðöngrum frá þeim tíma þegar erfitt var að ná mælingu utanum allann stofninn. Ferilfrávik líkansins sýna enga sýnilega leitni (Mynd 15).

Niðurstöður stofnmatsins eru sýndar á Mynd 16.

Hrygningarstofn síldar var stór árið 2007 en minkaði jafnt og þétt fram til ársins 2017 þrátt fyrir lítinn afla. Þessa hnignun má rekja til sýkingadauða af völdum Ichthyophonus sýkingarinnar og lélegrar nýliðunar, sérílagi árgangarnir frá 2011-2014. Árgangarnir 2017-2019 eru stórir og vegna þessa hefur hrygningarstofninn stækkað síðan 2020 en lækkar lítillega í ár þar sem stofnmatið telur 2018 og 2019 árgangana ekki jafn stóra eins og áður var talið. Upplýsingar um nýliðun eru lélegar sem leiðir til mikillar óvissu um nýliðun næstu ára. Veiðidánartala síldar hefur verið breytileg síðan 1980, náð hámarki á 9. áratug en svo farið lækkandi í.

Endurlitsgreining gefur til kynna leiðréttingu á stærð hrygningarstofns síðustu ár (Mynd 17). Mat á hrygningarstofni og fiskveiðidauða hefur verið nokkuð stöðugt en óvissa í kringum nýliðun veldur háum öryggismörkum. Í töflunni hér að neðan má sjá metið 5 ára Mohn´s \(\rho\) gildi (mælikvarði á stöðuleika í stofnmati hjá ICES) fyrir hrygningarstofn, veiðidánartölu og nýliðun sem eru öll innan viðmiðunarmarka (<0.2).

Nýliðun (R )	Hrygningarstofn (SSB)	Veiðidánartala (Fbar (5-10 ára))
-0.03	-0.05	0.09

Ráðgjöf um aflamark

Veiðiráðgjöf Hafrannsóknastofnunar á sumargotssíld fyrir fiskveiðiárið 2024/2025 byggir á ný samþykktri aflareglu íslenskra stjórnvalda (sjá næsta kafla). Lífmassi hrygningarstofnsins fyrir árið 2024 er áætlaður 412,1 þús. tonn og lífmassi 4+ ára (B_Ref) er 428,2 þús. tonn í byrjun árs 2024. Þar sem lífmassi hrygningarstofnsins verður fyrir ofan MGT B_trigger = 273 þús. tonn er ráðlagt aflamark samkvæmt aflareglu íslenskra stjórnvalda: HR_MGT × B_Ref = 0,19 × 428 249 = 81 637 tonn.

Fiskveiðistjórnun og gátmörk

Fiskveiðidánartala sem nam F_0.1 = F_MSY = 0.22 reyndist vel í að stjórna stofninum í um 30 ár, þrátt fyrir að stærð stofnsins hafi verið ofmetin og F verið hærra en stefnt var að um árabil (Mynd 16). Á fundi um prófun á aflareglu fyrir stofninn hjá Alþjóða hafrannsóknaráðinu árið 2024 voru viðmiðunarmörk fyrir stofninn endurskoðuð (ICES, 2014). Á grundvelli sambands nýliðunar og stofnstærðar frá árunum 1947–2015, var talið ráðlagt að halda B_lim = 200 þús. tonn. Önnur gátmörk voru m.a. ákvörðuð frá B_lim og samkvæmt leiðbeiningum frá ICES: B_pa = 273 þús. tonn (B_pa = B_lim × e1.645σ, þar sem σ = 0,19); HR_lim = 0,34 (HR sem leiðir til SSB = B_lim, sem er gefið meðaltal nýliðunar); HR_pa = 0,248 (HR sem leiðir til P(SSB > B_lim)> 95% með MSY B_trigger) .

Þrjár mismunandi aflareglur (HCR) voru prófaðar fyrir stofninn árið 2024 (ICES, 2024) og allar stóðust varúðarsjónarmið, og allar nema ráðgjafarreglan sem notuð var á þeim tíma (F_MGT = 0,15), voru í samræmi við ICES um hámarks jafnstöðuafla (MSY) nálgunina. Ein af þessum aflareglum var svo samþykkt af íslenskum stjórnvöldum til að byggja veiðiráðgjöf á. Þessi aflaregla er byggð á lífmassa viðmiðunarstofns fjögurra ára og eldri í upphafi ráðgjafarárs (B_ref, _Y), aðgerðarmörkum lífmassa hrygningarstofns (MGT B_trigger) sem skilgreindur er sem 273 þús. tonn, og veiðihlutfalli (HR_MGT) sem er 19% af viðmiðunarstofni. Á ráðgjafarárinu (Y) er aflamark næsta fiskveiðiárs (1. september ársins Y til 31. ágúst ársins Y + 1) því reiknað sem hér segir:

Þegar stærð hrygningarstofns, SSB_Y, er jafnt eða yfir MGT B_trigger:

TAC_{Y / Y + 1} = HR_MGT * B_ref, Y

Þegar SSB_Y er undir MGT B_trigger:

TAC_{Y / Y + 1} = HR_MGT * (SSB_y / MGT B_trigger) * B_ref, Y

Í aflaregluhermunum var gert ráð fyrir áframhaldandi Ichthyophonus sýkingu. Aflareglan er þó óháð mismunandi mati á dánartíðni af völdum sýkingarinnar.

Ástand stofnsins

Stofninn var stór í kringum 2007 en minnkaði stöðugt til ársins 2017 þrátt fyrir litla veiði. Þessi minnkun var afleiðing af Ichthyophonus sýkingardauða á árunum 2009–2011 og 2016–2018 en einnig vegna þess að nýliðun inn í stofninn var lítil. Síðan 2020 hefur nýliðun hefur verið góð og 2017-og 2018 árgangarnir eru stórir, sem hefur leitt til aukinnar stofnstærðar síðustu ár. Í stofnmati 2024 eru þessir árgangar ekki metnir jafn stórir og áður og því lækkar stofnstærðin 2024.

Skammtímaspá um þróun stofnstærðar

Lokakeyrsla SAM líkansins sem gaf fjölda eftir aldri 1. janúar 2024 var notað til grundvallar að framreikningum um þróun stofnstærðar. Öll gögn sem notuð voru fyrir spánna eru sýnd í töflu 3. Vegna væntanlegrar Ichthyophonus dánartíðni í stofninum vorið 2024 voru fjöldatölur frá líkaninu lækkaðar í samræmi við metið sýkingahlutfall 2023/2024, sem var margfaldað með 0,22, í samræmi við niðurstöður vinnuhópsins WKICEHER þar sem dánartíðni vegna sýkingarinnar var endurmetin (ICES 2024). Þetta er sama nálgun og notuð var í stofnmatinu 2009–2011 og 2018-2022 nema með uppfærðri dánartíðni (ICES, 2011b; 2018; Óskarsson o.fl. 2018a). Þyngd eftir aldri var ákvörðuð frá meðalþyngdum í afla síðasta árs (Mynd 7). Forsendur niðurstaðna í framreikningunum er í stuttu máli að hrygningarstofninn (SSB 2024) = 412,1 þús. tonn; lífmassi 4+ (1. janúar 2024) = 428,2 þús. tonn; afli (2023/24) =94,4 þús. tonn; og veiðihlutfall (HR 2023/24) = 0,19.

Niðurstöður gefa til kynna að hrygningarstofninn í byrjun fiskveiðiársins 2024/25 er áætlaður 412,1 þús. tonn, sem er yfir MGT B_trigger = 273 þús. tonn og lífmassi viðmiðunarstofns í byrjun árs 2025 er metinn 406 þús. tonn. Niðurstöður mismunandi sviðsmynda eru gefnar í töflu 4. Óvissa um þróun Ichthyophonus sýkingar á næstu mánuðum og árum, og óvissa um nýliðun inn í stofninn, er ástæðan fyrir því að ekki eru gerðir framreikningar lengra um þróun stofnstærðar.

Óvissa í stofnmati og spá

Það eru margir þættir sem gætu leitt til óvissu í matinu. Sem dæmi var mikil óvissa um sýkingardauða af völdum Ichthyophonus fyrstu árin eftir að hún hófst en eftir því sem árin liðu var unnt að meta sýkingardauðann betur (Óskarsson og fl. 2018a) sem er talið hafa dregið úr þessari óvissu. Nú er sýkingadauði metin fyrir allt tímabilið sem er talið réttara mat en áður og eykur gæði stofnmatsins (ICES 2024). Sýnt hefur verið fram á að lækkun á M í inntaksgögnum fyrir stofnmatið, líkt og gert var í ár, hefur þau áhrif að söguleg stærð stofnsins minnkar, en þetta hefur hins vegar lítil áhrif á mat síðasta árs og ráðgjöf. Annar óvissuþáttur tengdu stofnmatinu er stærð árganga sem eru að ganga inn í stofninn, en mat á stærð þeirra byggir á rýrum gögnum þar sem síldin er fyrst að koma í afla og verða mælanleg í bergmálsmælingum við þriggja ára aldur meðan að ekki er farið í ungsíldarmælingar.

Óvissa í framreikningum er sambærileg og getið er að ofan um óvissu í stofnmati. Því til viðbótar er fjöldi 2-3ja ára í byrjun árs 2024 metið með faldmeðaltali (e. geometric mean) áranna 1987-2021. Áður var farinn ungsíldarleiðangur í desember ár hvert, en enginn slíkur leiðangur hefur verið farinn frá 2020, sem mun valda enn meiri óvissu um stærð árganga sem munu ganga inn í stofninn á komandi árum.

Gæði stofnmats

Vöntun á stöðugleika milli ára í stofnmati síldar hefur oft valdið áhyggjum. Einkum var það tilhneiging til að ofmeta stærð stofnsins. Ekkert stofnmat var gert árið 2005 vegna gagna og líkanavandamála og næstu tvö ár hafnaði ACFM stofnmatinu vegna óstöðugleika í niðurstöðum stofnmatsins. Síðustu ár hefur verið meiri stöðugleiki og mat þessa árs eru stöðug fyrir stærð hrygningarstofns (SSB) og F (Mynd 16), en einnig hegða frávikin sér vel (Mynd 14). Þetta saman mætti ​​túlka sem vísbendingar um áreiðanlegra stofnmat.

Breytingar á fiskveiðitækni og veiðimynstri

Engar nýlegar breytingar eru á veiðitækni sem geta leitt til mismunandi aflasamsetningar. Veiðimynstrið á tímabilinu 2014/2015 til 2023/2024 var frábrugðið fyrri vertíðum. Í stað þess að veiða nær eingöngu á litlu strandsvæði við vesturströndina í nót, hafa veiðarnar farið fram vestan, sunnan, suðaustan og austan við landið og á síðasta fiskveiðiári fór veiðin aðallega fram fyrir vestan og austan. Þessar breytingar eru ekki taldar hafa áhrif á stærðarsamsetningu aflans og mismunandi veiðni eftir aldri því veiðarnar beinast jafnt að þéttum torfum í vetrarsetu og áður með stórum veiðarfærum.

Meðafli íslenskrar sumargotssíldar í veiðum á makríl (frá 2006) og norsk-íslenskri síld (frá 2004) hefur aukist nokkuð síðustu ár. Hún er aðallega veidd sem meðafli fyrir austan, suðaustan og sunnan við landið, sem sagt ekki á vetursetusvæðinu vestan við landið, þar sem aðalveiðarnar hafa farið fram síðustu ár. Góð sýnasöfnun er gerð úr þessum meðafla og undanfarin ár hefur hlutfall heildarafla, sem fenginn er sem meðafli, verið undir 10% en á nýafstöðnu fiskveiðiári var hlutfallið 30% alls afla (42% fiskveiðiárið 2022/2023). Austlægari útbreiðsla stóru 2017, 2018 og 2019 árgangana útskýra þessa aukningu í meðafla, sem voru um 52% aflans fyrir austan land. Þetta mynstur sást einnig í bergmálsmælingum haustið 2022 þar sem stærri hluti stofnsins sást fyrir austan (Bjarnason, 2023).

Veiðimynstrið er breytilegt milli ára sem tengist meðal annars breytingum á vetrardreifingu stofnsins og aldurssamsetningu. Þessi breytileiki getur haft afleiðingar fyrir aflasamsetningu sem ómögulegt er að spá fyrir um.

Samspil tegunda og umhverfis

Rannsóknir á samspili tegunda er aðallega fólgin í að skoða aukið magn makríls á íslenska hafsvæðinu eftir 2006 (Astthorsson o.fl., 2012; Nøttestad o.fl., 2016). Sumarleiðangrar frá 2010 benda til mikillar skörunar, bæði svæðisbundið og eftir tíma, á makríl og sumargotssíld (Óskarsson o.fl., 2016). Einnig sýndu rannsóknir á fæðusamsetningu makríls á Íslandsmiðum greinilega skörun við síldarstofnana tvo, þ.e.a.s. íslenska sumargotssíld og norsk-íslenska síld (Óskarsson o.fl., 2016; Kvaavik o.fl. 2021). Jafnvel þó að krabbaflær (copepoda) séu mikilvæg fæða fyrir alla þrjá stofnana, var hlutfallslegt magn þeirra hærra hjá makríl en hjá síldarstofnunum. Miðað við fyrri rannsóknir á fæðu síldar var þessi niðurstaða óvænt og sérstaklega hve lítið af krabbaflóm voru að finna í fæðu síldar en hlutfallslega meira af ljósátu (Euphausiacea). Rannsóknir í Noregshafi sýna svipaðar niðurstöður (Langøy o.fl., 2012; Debes o.fl., 2012).

Munur á fæðuvistfræði tegundanna er ennfremur studd af því að líkamsástand síldarstofnana hefur ekki breyst síðan makríll fór að ganga aftur við landið. Þvert á móti hafa meðalþyngdir eftir aldri (og lengd) sumargotssíldar verið háar eftir 2010 (Óskarsson, 2019) og var methá haustið 2014. Þó skal tekið fram að samanburður á fæðusamsetningu síldar undanfarin ár við fyrri rannsóknir, aðallega fyrir norsk-íslenska síld, benda til þess að síldin sé að sækja meira í ljósátu í stað krabbaflóa, sem var hennar aðalfæða. Það er hugsanlega afleiðing af aukinni samkeppni við makrílinn. NWWG hópurinn hjá ICES er ekki kunnugt um neinar umfangsmiklar vistkerfis- eða umhverfisbreytingar sem gætu haft áhrif á síldarstofninn, sem annars væru teknar til greina við veiðiráðgjöf. Sem dæmi hefur verið sýnt fram á að nýliðun í stofninn sýnir jákvætt, en veikt, samband við vísitölu NAO (Norður-Atlantshafssveiflu) og sjávarhita (Óskarsson og Taggart, 2010) á meðan vísitölur um magn dýrasvifs á vorin virðast ekki hafa áhrif á nýliðun (Óskarsson og Taggart, 2010), né líkamsástand og vaxtarhraða fullorðna hluta stofnsins (Óskarsson, 2008). Ef tekið er mið af þessum samböndum, og gögnin eru skoðuð í sögulegu samhengi, hefur verið tiltölulega hlýr sjór í kringum landið (Hafrannsóknastofnun 2016) og jákvætt NAO undanfarin ár (NOAA 2021) haft góð áhrif á nýliðun síldar eins og sést með sterkum 2017, 2018 og 2019 árgöngum.

Heimildaskrá

1. Astthorsson, O. S., Valdimarsson H., Gudmundsdóttir, Á., Óskarsson, G.J. 2012. Climate-related variations in the occurrence and distribution of mackerel (Scomber scombrus) in Icelandic waters. ICES Journal of Marine Science. 69: 1289–1297.

2. Bjarnason, S. 2023. Results of acoustic measurements of Icelandic summer-spawning herring in the winter 2022/2023. ICES North Western Working Group, 24 - 28 April 2023, Working Document No. 01. 36 pp.

3. Bjarnason, S. 2024. Results of acoustic measurements of Icelandic summer-spawning herring in the winter 2023/2024. ICES North Western Working Group, 22 - 26 April 2024, Working Document No. 01. 36 pp.

4. Björnsson, H. 2018. Icelandic herring. ICES Northwestern Working Group, 27 April - 4 May 2018, Working Document No. 20. 2 pp.

5. Carvalho, F., et al. “A cookbook for using model diagnostics in integrated stock assessments”. In: Fisheries Research 240 (2021), p.105959.

6. Debes, H., Homrum, E., Jacobsen, J. A., Hátún, H., and Danielsen, J. 2012. The feeding ecology of pelagic fish in the southwestern Norwegian Sea – Inter species food competition between herring (Clupea harengus) and mackerel (Scomber scombrus). ICES CM 2012/M:07. 19 pp.

7. Fiskistofa, http://www.fiskistofa.is/veidar/aflaupplysingar/heildaraflamarksstada/

8. Guðmundsdóttir, Á., G.J. Óskarsson, and S. Sveinbjörnsson 2007. Estimating year-class strength of Icelandic summer-spawning herring on the basis of two survey methods. ICES Journal of Marine Science, 64: 1182–1190.

9. Hafrannsóknastofnun 2016. Þættir úr vistfræði sjávar 2015, https://www.hafogvatn.is/is/midlun/utgafa/haf-og-vatnarannsoknir/thaettir-ur-vistfraedi-sjavar-2015.

10. ICES. 2011a. Report of the Benchmark Workshop on Roundfish and Pelagic Stocks (WKBENCH 2011), 24–31 January 2011, Lisbon, Portugal. ICES CM 2011/ACOM:38. 418 pp.

11. ICES. 2011b. Report of the North Western Working Group (NWWG), 26 April - 3 May 2011, ICES Headquarters, Copenhagen. ICES CM 2011/ACOM:7. 975 pp

12. ICES. 2014. Report of the North Western Working Group (NWWG), 24 April-1 May 2014, ICES HQ, Copenhagen, Denmark. ICES CM 2014/ACOM:07. 902 pp.

13. ICES. 2016. Report of the North-Western Working Group (NWWG), 27 April–4 May, 2016, ICES Headquarters, Copenhagen. ICES CM 2016/ACOM:08.

14. ICES. 2017a. Icelandic Waters ecoregion – Ecosystem overview. http://ices.dk/sites/pub/Publication%20Reports/Advice/2017/2017/Ecosystem_overview-Icelandic_Waters_ecoregion.pdf

15. ICES. 2017b. Report of the Workshop on Evaluation of the Adopted Harvest Control Rules for Icelandic Summer Spawning Herring, Ling and Tusk (WKICEMSE), 21–25 April 2017, Copenhagen, Denmark. ICES CM 2017/ACOM:45. 49 pp.

16. ICES. 2017c. Report of the North Western Working Group (NWWG), 27 April – 4 May 2017, Copenhagen, Denmark. ICES CM 2017/ACOM:08. 642 pp.

17. ICES. 2018. Report of the North-Western Working Group (NWWG), 26 April–3 May, 2018, ICES HQ, Copenhagen, Denmark. ICES CM 2018/ACOM:09. 733 pp.

18. ICES. 2024. Workshop on the assessment and management plan evaluation for Icelandic herring (WKICEHER). ICES Scientific Reports. 6:37. 91 pp. https://doi.org/10.17895/ices.pub.25605135

19. Jakobsson, Jakob., Vilhjálmsson, Hjálmar & Schopka, Sigfús A. 1969. On the biology of the Icelandic herring stocks. Rit Fiskideildar 4. 1-16.

20. Jakobsson, Jakob. 1980. Exploitation of the Icelandic spring- and summer spawning herring in relation to fisheries management, 1947-1977. Rapports et Proces-Verbaux des Reunions Conseil International pour l’exploration de la Mer 177. 23-42.

21. Jakobsson, Jakob. 2000. Lífríki sjávar - Síld. Námsgagnastofnun og Hafrannsóknastofnun. 8 bls.

22. Jones, S.R.M. and Dawe, S.C., 2002. Ichthyophonus hoferi Plehn & Mulsow in British Columbia stocks of Pacific herring, Clupea pallasi Valenciennes, and its infectivity to chinook salmon, Oncorhynchus tshawytscha (Walbaum). Journal of Fish Diseases 25, 415-421.

23. Kvaavik, C., Óskarsson, G. J., Pétursdóttir, H., Marteinsdóttir, G., and Daníelsdóttir, A. K. New insight into trophic niche partitioning and diet of mackerel (Scomber scombrus) and herring (Clupea harengus) in Icelandic waters. – ICES Journal of Marine Science, doi:10.1093.

24. Langøy, H., Nøttestad, L., Skaret, G., Broms, C. and Fernö, A. 2012. Overlap in distribution and diets of Atlantic mackerel (Scomber scombrus), Norwegian spring- spawning herring (Clupea harengus) and blue whiting (Micromesistius poutassou) in the Norwegian Sea during late summer. Marine biology research, 8: 442–460.

25. Nøttestad, L., Utne, K.R., Guðmundur J. Óskarsson, Sigurður Þ. Jónsson, Jacobsen, J.A., Tangen, Ø., Anthonypillai, V., Aanes, S., Vølstad, J.H., Bernasconi, M., Debes, H., Smith, L., Sveinn Sveinbjörnsson, Holst, J.C., Jansen, T. og Slotte, A. 2016. Quantifying changes in abundance, biomass and spatial distribution of Northeast Atlantic mackerel (Scomber scombrus) in the Nordic seas from 2007 to 2014. ICES Journal of Marine Science, 73: 359-373.

26. Óskarsson, G.J. 2008. Variation in body condition, fat content and growth rate of Icelandic summer-spawning herring (Clupea harengus L.). Journal of Fish Biology 72: 2655–2676.

27. Óskarsson, G.J. 2019. Estimation on number-at-age of the catch of Icelandic summer-spawning herring in 2018/2019 fishing season and the development of Ichthyophonus sp. infection in the stock. ICES North Western Working Group, 25 April - 1 May 2019, Working Document No. 5. 15 pp.

28. Óskarsson, G.J., Á. Guðmundsdóttir & Þ. Sigurðsson. 2009. Variation in spatial distribution and migration of Icelandic summer-spawning herring. ICES Journal of Marine Science 66. 1762-1767.

29. Óskarsson, Guðmundur J. & Taggart, C.T. 2009. Spawning time variation in Icelandic summer-spawning herring (Clupea harengus L.). Canadian Journal of Fisheries and Aquatic Science 66. 1666-1681.

30. Óskarsson, G.J. and C.T. Taggart 2010. Variation in reproductive potential and influence on Icelandic herring recruitment. Fisheries Oceanography. 19: 412–426.

31. Óskarsson, G.J. and Pálsson, J. 2018. Estimation on number-at-age of the catch of Icelandic summer-spawning herring in 2017/2018 fishing season and the development of Ichthyophonus sp. infection in the stock. ICES North Western Working Group, 27 April - 4 May 2018, Working Document No. 2. 15 pp.

32. Óskarsson, G.J., A. Gudmundsdottir, S. Sveinbjörnsson & Þ. Sigurðsson 2016. Feeding ecology of mackerel and dietary overlap with herring in Icelandic waters. Marine Biology Research, 12: 16-29.

33. Óskarsson, G.J., Ólafsdóttir, S.R., Sigurðsson, Þ., and Valdimarsson, H. 2018b. Observation and quantification of two incidents of mass fish kill of Icelandic summer spawning herring (Clupea harengus) in the winter 2012/2013. Fisheries Oceanography. DOI: 10.1111/fog.12253.

34. Óskarsson, G.J., Pálsson, J., and Gudmundsdottir, A. 2018a. An ichthyophoniasis epizootic in Atlantic herring in marine waters around Iceland. Can. J. Fish. Aquat. Sci. dx.doi.org/10.1139/cjfas-2017-0219.

35. Skagen, D. 2012. HCS program for simulating harvest control rules. Program description and instructions for users. Version HCS12_2. Available from the author.

36. NOAA 2021: National Oceanic and Atmospheric Administration, National weather service – Climate prediction center http://www.cpc.ncep.noaa.gov/products/precip/CWlink/pna/nao.shtml.

Töflur

Tafla 1: Fjöldi aldursgreindra fiska (fjöldi hreistra) og fjöldi sýna sem tekin voru í árlegum bergmálsleiðöngrum 1987/88–2023/24 (aldur vísar til fyrra árs, þ.e. hausts). Á árinu 2000 voru sjö sýni notuð úr veiðinni.

Fjöldi hreistra																Fjöldi sýna
Ár	2	3	4	5	6	7	8	9	10	11	12	13	14	15+	Samtals	Samtals	Vestur	Austur
1987/88	11	59	246	156	37	28	58	33	22	16	23	10	5	8	712	8	1	7
1988/89	229	78	181	424	178	69	50	77	42	29	23	13	7	12	1412	18	5	10
1989/90	38	245	96	132	225	35	2	2	3	3	2	0	0	0	783	8		8
1990/91	418	229	303	90	131	257	28	6	3	8	0	0	0	0	1473	15		15
1991/92	414	439	127	127	33	48	84	5	3	0	2	0	0	1	1283	15		15
1992/93	122	513	289	68	73	28	38	34	6	2	2	6	0	0	1181	12		12
1993/94	63	285	343	129	13	15	7	14	11	0	1	3	0	0	884	9		9
1994/95
1995/96	183	90	471	162	209	107	38	18	8	14	18	2	0	0	1320	14	9	5
1996/97	24	150	88	351	141	137	87	32	15	10	7	14	4	2	1062	11	4	7
1997/98	101	249	50	36	159	95	122	62	21	13	8	15	8	5	944	14	7	7
1998/99	130	216	777	72	31	65	59	86	37	22	17	5	6	11	1534	17	10	7
1999/00	116	227	72	144	17	13	26	26	27	10	8	2	1	0	689	7	3	4
2000/01	116	249	332	87	166	10	7	21	8	14	11	3	3	0	1025	14	10	4
2001/02	61	56	130	114	62	136	25	24	17	21	17	10	3	0	676	9	4	5
2002/03	520	705	258	104	130	74	128	46	26	25	13	15	10	1	2055	22	12	10
2003/04	126	301	415	88	35	32	15	17	3	4	4	6	1	1	1048	13	8	5
2004/05	304	159	284	326	70	29	17	5	8	4	0	3	3	0	1212	13	4	9
2005/06	217	312	190	420	501	110	40	38	26	18	5	5	5	7	1894	22	14	8
2006/07	19	77	134	64	71	88	22	4	2	2	0	0	0	1	484	6	4	2
2007/08	58	288	180	264	85	80	104	19	15	2	2	6	1	3	1107	17	13	4
2008/09	274	208	213	136	204	123	125	97	18	13	9	7	4	17	1448	29	19	10
2009/10	104	100	105	116	60	74	34	19	36	8	3	4	2	2	667	17	10	7
2010/11	35	74	102	157	139	61	119	22	52	36	13	0	1	0	811	11	8	3
2011/12	229	330	134	115	100	106	74	87	45	48	51	10	3	3	1335	15	9	6
2012/13	42	266	554	273	220	252	198	165	126	114	69	61	12	2	2370	60	55	5
2013/14	26	472	275	414	199	200	199	208	163	138	90	85	60	23	2552	45	37	8
2014/15	83	50	96	71	72	53	32	26	11	22	8	3	6	4	534	10	8	2
2015/16	229	112	131	208	148	123	47	32	32	22	13	7	12	4	1120	14	7	7
2016/17	66	164	122	137	202	117	169	43	50	44	14	15	9	4	1162	14	12	2
2017/18	35	58	82	77	75	101	65	77	29	11	27	18	8	9	672	10	5	5
2018/19	28	39	31	98	50	53	77	75	36	15	15	21	5	4	547	7	5	2
2019/20	265	143	94	48	101	60	43	54	45	43	27	26	20	6	975	10	5	5
2020/21	248	215	116	68	59	104	52	79	55	44	35	13	6	8	1102	13	5	8
2021/22	39	89	588	258	254	113	138	87	78	49	34	24	19	8	1890	12	5	7
2022/23	214	306	410	388	127	118	120	90	83	83	61	41	37	15	2093	13	4	9
2023/24	48	529	652	396	192	208	84	110	65	54	29	25	14	8	2414	9	6	3

Tafla 2: Landaður afli, afli, tillögur um hámarksafla og ákvörðun stjórnvalda um aflamark. Eftir 2012/2013 er landaður afli og síldarafli sem veiddur var sem meðafli á veiðum á makríl og norsk-íslenskri síld um sumar (tilheyrir fyrra fiskveiðiári) og um haust.

Fiskveiðiár	Landað	Afli	Tillaga	Aflamark
1972	0.310	0.310
1973	0.254	0.254
1974	1.275	1.275
1975	13.280	13.280
1976	17.168	17.168
1977	28.925	28.925
1978	37.333	37.333
1979	45.072	45.072
1980	53.268	53.268
1981	39.544	39.544
1982	56.528	56.528
1983	58.867	58.867
1984	50.304	50.304
1985	49.368	49.368	50.0	50.0
1986	65.500	65.500	65.0	65.0
1987	75.000	75.000	70.0	73.0
1988	92.800	92.800	90.0	90.0
1989	97.300	101.000	90.0	90.0
1990/1991	101.600	105.100	80.0	110.0
1991/1992	98.500	109.500	80.0	110.0
1992/1993	106.700	108.500	90.0	110.0
1993/1994	101.500	102.700	90.0	100.0
1994/1995	132.000	134.000	120.0	120.0
1995/1996	125.000	125.900	110.0	110.0
1996/1997	95.900	95.900	100.0	100.0
1997/1998	64.700	64.700	100.0	100.0
1998/1999*	87.000	87.000	90.0	70.0
1999/2000	92.900	92.900	100.0	100.0
2000/2001	100.300	100.300	110.0	110.0
2001/2002	95.700	95.700	110.0	125.0
2002/2003**	96.100	96.100	125.0	105.0
2003/2004**	130.700	130.700	105.0	110.0
2004/2005	114.200	114.200	110.0	110.0
2005/2006	103.000	103.000	110.0	110.0
2006/2007	135.000	135.000	130.0	130.0
2007/2008	158.900	158.900	130.0	150.0
2008/2009	151.800	151.800	130.0	150.0
2009/2010	46.300	46.300	40.0	47.0
2010/2011	43.500	43.500	40.0	40.0
2011/2012	49.400	49.400	40.0	45.0
2012/2013	72.000	72.000	67.0	68.5
2013/2014	72.000	72.000	87.0	87.0
2014/2015	95.000	95.000	83.0	83.0
2015/2016	69.700	69.700	71.0	71.0
2016/2017	60.400	60.400	63.0	63.0
2017/2018	35.000	35.000	39.0	39.0
2018/2019	40.700	40.700	35.1	35.1
2019/2020	30.000	30.000	34.6	34.6
2020/2021	36.100	36.100	35.5	35.5
2021/2022	70.100	70.100	72.2	72.2
2023/2024	94.400	94.400	92.6	92.6
2024/2025			81.3	81.3

: *Aflamark var ákveðið sem 70 þúsund tonn, en vegna þess að flutningur varð á kvóta frá fyrra kvótaári yfir á þetta ár endaði leyfilegur afli í 90 þúsund tonnum. ** Sumarveiðar 2002 og 2003 eru meðtalin.

Tafla 3: Inntaksgögn notuð í framreikningum á stofninum í stofnmatinu, fengið úr líkaninu. Meðalþyngd, náttúrulegur dauði (M), hlutfall kynþroska, valmynstur, dánartíðni fyrir hrygningu og fjöldi eftir aldri.

Aldur (árgangur)	Meðalþyngd (kg)	M	Hlutfall kynþroska	Valmynstur	Dánartíðni fyrir hrygningu- F	Dánartíðni fyrir hrygningu- M	Fjöldi eftir aldri (1 Janúar 2024)
3 (2021)	0.154	0.100	0.20	0.13	0	0.5	568.6
4 (2020)	0.220	0.109	0.85	0.52	0	0.5	268.7
5 (2019)	0.262	0.107	1.00	1.00	0	0.5	393.0
6 (2018)	0.285	0.106	1.00	1.00	0	0.5	307.8
7 (2017)	0.307	0.114	1.00	1.00	0	0.5	208.5
8 (2016)	0.322	0.129	1.00	1.00	0	0.5	100.0
9 (2015)	0.331	0.139	1.00	1.00	0	0.5	69.4
10 (2014)	0.353	0.149	1.00	1.00	0	0.5	43.7
11 (2013)	0.363	0.136	1.00	1.00	0	0.5	44.8
12 (2012)	0.369	0.153	1.00	1.00	0	0.5	23.6
13 (2011)	0.377	0.159	1.00	1.00	0	0.5	22.9
14 (2010)	0.389	0.159	1.00	1.00	0	0.5	15.7
15 (2009)	0.388	0.159	1.00	1.00	0	0.5	10.3

Tafla 4: Áætluð þróun viðmiðunarstofns og hrygningarstofns (í þúsundum tonna) fyrir fiskveiðiárið 2024/2025 miðað við veiðar samkvæmt aflareglu. Hrygningarstofninn (1. júlí 2024) verður 412,1 þús. tonn (gert ráð fyrir Msýkt 2024); lífmassi 4+ (1. jan 204) er 428,2 þús. t tonn; afli (2023/24) var 94,4 þús. tonn og veiðihlutfall 2023/24 var 0.19. Aðrar sviðsmyndir eru einnig sýndar.

Nálgun	Afli (2024/2025)	Grunnur	F (2024/2025)	Lífmassi 4+ (2025)	Lífmassi hrygningastonfns (SSB 2025)	% SSB breyting*	% Afli breyting**
Aflaregla	81.4	HR = 0.19	0.232	406	401	-3	-14
MSY nálgun	94.6	HRMSY = 0.22	0.275	393	388	-5	>1
Engin veiði	0.0	F = 0	0.000	487	475	15	-100
HRpa	106.0	HRpa = 0.248	0.314	382	378	-8	13
HRlim	145.0	HRlim = 0.34	0.456	343	342	-15	54

*Lífmassi hrygningarstofns (SSB) 2025 miðað við SSB 2024

**Leyfilegur heildarafli 2024/25 í samanburði við landaðan afla 2023/24

Myndir

Mynd 1. Samanburður á bergmálsvísitölum íslenskrar sumargotsíldar frá 1973/74 til 2023/24 (aldur miðast við haust) fyrir 3 ára og eldri síld fyrir vestan, austan (og sunnan) og samanlagðar vísitölur.

Mynd 21. Leiðangurslínur bergmálsleiðangra fyrir suðaustan og sunnan landið (febrúar 2024; AH3-2024; rauðar og AMM3-2024; bláar) og fyrir vestan (mars 2024; B4-2024; grænar).

Mynd 3. Sýkingarhlutfall af völdum Ichthyophonus fyrir hvern árgang 1999-2020. Metið í aflasýnum fyrir vestan og fyrir austan í sýnum sem tekin voru í bergmálsleiðangri.

Mynd 4. Landaður afli íslenskrar sumargotssíldar þúsundum tonna frá 1947. Landaður afli eftir veiðarfærum er sýndur frá 1975.

Mynd 5. Dreifing afla íslenskrar sumargotssíldar í tonnum frá 1991-2023. Fyrir árin 2007-2010 er sýnd dreifing stofnsins í Breiðafirði.

Mynd 6. Aldurskiptar vísitölur úr afla (vinstri) og bergmálsleiðöngrum (hægri). Litur súlna fylgir árgangi.

Mynd 7. Síld. Stofnþyngdir eftir aldri úr afla.

Mynd 8. Aflaferlar (log2 af gildum) sem sýna fjölda sem mældir voru í leiðöngrum fyrir árganga 1989–2018. Gráar línur tákna heildardánarstuðul Z = 0.4.

Mynd 9. Aflaferlar (log2 af gildum) sem sýna fjölda í afla eftir aldri, fyrir árganga 1989–2018. Gráar línur tákna heildardánarstuðul Z = 0.4. Búið er að bæta fjöldadauðanum í Kolgrafafirði við aflann 2012.

Mynd 10. Skýringamynd af metnum stikum líkansins. Vogtölur einstakra aldurshópa í afla og vísitölum (efri t.v.), dreifni ferilfrávika (efri t.h.) og veiðanleiki (neðri, t.v.).

Mynd 11. Náttúrulegur dánarstuðull (M) eftir aldri og árum (vísar til hausts) þar sem frávik frá föstu M = 0.1 er vegna *Ichthyophonus* sýkingar.

Mynd 12. Samsvörun stofnmatslíkans (SAM) við aldursgreindan afla (aldur 2-15 ára).

Mynd 13. Samsvörun stofnmatslíkans (SAM) við aldursgreindar vísitölur úr leiðöngrum (aldur 3-15 ára).

Mynd 14. Frávik stofnlíkansins frá leiðangursgögnum (efst), ungsíldarleiðangri (miðja) og afla (neðst). Rauðir hringir eru jákvæð frávik (þ.e. leiðangurs- eða aflagildin reyndust hærri en stofnmatsgildin) og bláir hringir tákna neikvæð frávik.

Mynd 15. Ferilfrávik stofnmatslíkan. Rauðir hringir tákna jákvæð aðhvarfsfrávik (niðurstöður mælingar eru stærri en spágildi).

Mynd 16. Niðurstöður stofnmats 2024. Myndin sýnir heildarafla, nýliðun (2 ára), veiðidánartölu (5-10 ára), nýtingarhlutfall og lífmassa hrygningarstofns ásamt viðmiðunarlífmassa (B4+).

Mynd 17. Endurlitsgreining sem sýnir stöðuleika í mati líkansins fimm ár aftur í tímann. Niðurstöður eru sýndar fyrir afla, lífmassa hrygningarstofns, nýliðun (2ja ára) og fiskveiðidauða þ.e. vegið F fyrir 5-10 ára.